Шочмо кундем

Шочмо кундем

Кукнур кечын – кава гыч мече

Арня тӱҥалтыште шуматкечылан пылан-йӱран игечым сӧрышт. Тыгай годым кеч-кунамат мероприятийым эртарен колтымо шотышто тургыжланымаш лектеш. Кукнур кече вашеш чумырымо оргкомитет еҥ-шамыч коклаште Пӱртӱс Авам сӧрвалаш кӱлеш манмат шоктыш. Юмыйӱлам шуктен шогышо еҥ лыпландарыш: ида тургыжлане, чыла сай лиеш. Вет тиде кече моторын да ласкан эртыже манын, шукын шонат.

Тыгак лие. Кече шичме деч вара Кукнур села ӱмбалым У Торъял, Кышма, Лошкари велым пыл авалтыш. Чумбылат велныла волгыдо коеш. Ты волгыдыштыжо школ стадион ӱмбалне шем корак ора моткочак пӧрдын чогыматыш. Тыгай сӱретым кугарнян кастене эскерышым. Тиде кечынак Кукнур кундемысе ятыр суртышто, коҥгаш олтен, мелнам кӱэштыныт, когылым, эгерчым ыштеныт, родо-шочшым, унам вашлийын сийлаш, йӱла дене кылдалтше конкурсланат ямдылалтыныт. Эрдене йӱрат шыжаш тӧчыш, но чонышто улшо кӱкшӧ кумыл пылым «шалатыш». Футбол команде гыч рвезын машинаж гыч Кукнурын гимнже селан ик лукшым шергылтарыш. Индеш шагат лийшан кече шыратен ончале да кечыгут пайрем кумылым вӱчкыш.

Светлана Пехметова

Авторын фотожо-влак

Умбакыже - "Марий Эл" газетын сайтыштыже

https://газетамарийэл.рф/?p=37736&preview=true

Снимкылаште:

полышым пуышо-влаклан – В.Мочаев деч пӧлек; сеҥыше футбол команде-влак; Кукнур дее Чисола ял ветеран-влак ушемын командыже; акак-шӱжарак Галина ден Любовь Никитичнамыт да Галина Никитчинан Элла ӱдыржӧ, «Кава гыч гол. Конаков П.Н.», В.Мочаев, Мужество Орденын кавалерже Павел Конаков; А.Виноградов, Е.Чепаков (Кукнур школын туныктышыжо, организатор), А.Колесников, В.Филимонов; полковник А.Конаков, чоҥышо Л.Конаков, врач В.Паймеров; журналист А.Антонов, футболист да тренер В.Филимонов, МРМТ-ын ончычсо директоржо В.Данилов, журналист С.Щеглов.